Traserĉi, konservi, valorigi kaj esplori verkojn en rilato kun internaciaj lingvoj. Proponi laborilojn kaj konilojn al esplorantoj el la tuta mondo kaj el ĉiuj interlingvaj komunumoj.

La statuta celo de CDELI estas esploro, konservo, ordigo kaj studo de libroj, broŝuroj, periodaĵoj kaj aliaj dokumentoj presitaj aŭ manskribitaj rilate al iu ajn internacia lingvo.

Verkoj katalogitaj (ĉirkaŭ 20'000 biobliografiaj unuoj, noticoj konsulteblaj per la papera sliparo aŭ per RERO). Temas libre kaj broŝure pri longo 180-metra, kaj pri longo 130-metra el 2500 malsamaj periodaĵoj. Inter tiuj ĉi revuoj kaj cirkuleroj, 1900 titoloj rilatas al Esperanto, 190 al Ido, 75 al Occidental, 60 al Volapük, 50 al Interlingua de IALA kaj por la resto al aliaj artefaritaj lingvoj. La arĥivaro nekatalogita etendiĝas je longo 140-metra. Ĝi konsulteblas nur en ĉeesto de la arĥivisto. 

Brokanta servo pri duoblaĵoj el katalogitaj verkoj : libroj kaj periodaĵoj (longo 60-metra) faciligas interŝanĝojn kun aliaj bibliotekoj kaj ebligas al esplorantoj kaj kolektantoj riĉigon de la propraj kolektoj. Ĝi proponis 2183 titolojn de libroj kaj 1166 de periodaĵoj komence de la jaro 2011-a. 

La laborsalono de CDELI kaj ties ĝenerala papera sliparo alireblas nur laŭ rendevuo kun la arĥivisto. 

Nur la CDELI-dokumentoj, kies signaturo komenciĝas per ESP-P estas elprunteblaj. Ĉiuj aliaj dokumentoj (libroj, broŝuroj, periodaĵoj kaj divers-specaj arĥivaĵoj) konsulteblas nur surloke. Konsulto aŭ reprodukto de korespondaĵoj kaj societaj arĥivaroj estas submetitaj al permes-ricevo.

Pri interlingvistiko indas mencii, ke en la CDELI-dokumentaroj la sekvaj artefaritaj lingvoj konsistas el kolektoj tre plenaj : Esperanto, Ido, Interlingua de IALA, Lingvoj de René de Saussure aŭ Antido (Esperantida, Novesperanto), Latino sine flexione aŭ Interlingua aŭ Latino viventi, Occidental aŭ Interlingue. La dokumentaro pri Volapük relative riĉas. Aliaj projektoj de artefaritaj lingvoj konsulteblas laŭ peto. 

CDELI rezultas el savado de interlingvististikaj arĥivaroj, kiun Claude Gacond plenumadas ekde sia studo de Esperanto en 1952. Observinte tiam stultan detruon de gravega libraro kaj de tre plena arĥivaro sekve al akcidenta morto de la posedanto, Claude Gacond komencis atentigi posedantojn de tiaj dokumentaroj pri la neceso ilin protekti kontraŭ simila detru-danĝero. Ĝuste tial fondiĝis CDELI en 1967 far Claude Gacond kaj Fernand Donzé, la tiama direktoro de la Biblioteko, kun la apogo de Svisa Esperanto-Societo, kiu donacis siajn libraron kaj arĥivaron. Ekde tiam multaj donacoj kaj heredigoj kompletigis kaj daŭre pliriĉigas la dokumentaron de CDELI. Laŭ ilia interlingvistika tendenco jen listo de la plej gravaj donacintoj, kiuj ofte estas konataj pro sia aktiveco. Por Esperanto : la ĝenevanoj Paul Bouvier, Henriette Ith, sekretariino de Pierre Bovet, kaj Hans Jakob, direktoro de Universala Esperanto-Asocio; la neŭŝatelanoj René kaj William Perrenoud, kaj la verkisto Claude Piron en Gland. Por Ido : Henry Jacob en Loughton (Britio), Clara Kreis-Schneeberger en Genève, Henri Meier en Esch-sur-Alzette (Luksemburgio) kaj Edouard Watterkote en Colmar (Francio). Por Occidental : Louis de Guesnet en Parizo, Alphonse Matejka en La Chaux-de-Fonds kaj Fred Lagnel en Corseau (VD). Por Interlingua de IALA : André Schild en Bazelo, aŭtoro de la lingvoprojekto Neolatino. Kaj apartenanta al ĉiuj interlingvistikaj tendencoj : Tazio Carlevaro. 

Claude Gacond ĉiam efektivigis sian aktivecon por CDELI sen ajna salajrado, ĉirkaŭata de efika helpantaro fidela, inter kiuj viglas lia edzino André Gacond. La kontribuo de la Biblioteko de la Urbo manifestiĝis per disponigo de la necesaj laborejoj kaj de teknika apogo alportata de bibliotekistoj. Nur ekde januaro 2002 bibliotekistino estis triontempe salajrata por la kataloga laboro per la RERO-sistemo. Kiam ŝi emeritiĝis en 2008, tiam kreiĝis Asocio de Amikoj de CDELI kun la celo daŭrigi ŝian salajradon, por ke ŝia laboro ne interrompiĝu.  La bonvolaj kunlaborantoj direktas sian strebadon al la ordigo de arĥivaroj, por ke ili iĝu pli facile konsulteblaj por la esplorantoj. 

Kunlaboreme kun Internacia Esperanto-Muzeo en Vieno kaj Universala Esperanto-Asocio en Rotterdamo, ekde sia fondiĝo CDELI pretigas bibliografion de Esperanto kaj interlingvistiko laŭ la propraj kolektoj. Ĝi nune dediĉas sian strebadon al traserĉo de libroj, broŝuroj kaj periodaĵoj cele al kompletigo de la antaŭvidita bibliografio kaj al kontaktado de eldonejoj kun interlingvistika sekcio. Aparta dankemo direktiĝas al la eldonejoj kaj redakcioj regule havigantaj al CDELI specimenon de siaj publikaĵoj kaj al ĉiuj personoj donacantaj al CDELI siajn librojn kaj dokumentojn en internaciaj lingvoj. La verkoj jam posedataj de CDELI riĉigas la brokantan servon.